Ky Kod përcakton parimet e punës editoriale të ORA NEWS për përmbajtjet informative të transmetuara në televizion dhe të publikuara në faqen zyrtare dhe platformat digjitale. Ai zbatohet nga gazetarët, redaktorët, drejtuesit editorialë dhe bashkëpunëtorët në ushtrimin e detyrave të tyre.
ORA NEWS udhëhiqet nga saktësia, pavarësia editoriale, paanshmëria, pluralizmi, interesi publik dhe respektimi i të drejtave të njeriut. Redaksia dallon faktet e verifikuara nga pretendimet dhe opinionet. Nuk krijon baraspeshë artificiale mes provave të dokumentuara dhe pretendimeve të pambështetura.
Lajmet përzgjidhen sipas aktualitetit, rëndësisë për publikun, ndikimit në shoqëri dhe besueshmërisë së informacionit. Titujt dhe njoftimet duhet të përputhen me përmbajtjen, pa ekzagjerime apo përfundime të pambështetura. Interesat politike, personale dhe tregtare nuk përcaktojnë përzgjedhjen editoriale.
Në përputhje me identitetin “Të parët për lajmin e fundit”, ORA NEWS raporton me shpejtësi, por saktësia mbetet përparësi. Informacionet paraprake identifikohen si të tilla; faktet e konfirmuara ndahen nga ato në verifikim. Gjatë zhvillimit të ngjarjeve, redaksia përditëson informacionin dhe korrigjon pa vonesë pasaktësitë.
Informacioni kontrollohet, sa herë që është e mundur, përmes dokumenteve, burimeve të drejtpërdrejta dhe konfirmimeve të pavarura. Deklaratat dhe pretendimet u atribuohen qartë autorëve. Burimet anonime përdoren vetëm kur konfidencialiteti është i justifikuar dhe informacioni i tyre i nënshtrohet vlerësimit të kujdesshëm editorial.
Përpara përdorimit, fotografitë, videot dhe përmbajtjet e marra nga rrjetet sociale vlerësohen për autenticitetin, origjinën, kohën dhe kontekstin. Pamjet arkivore identifikohen kur ekziston rreziku i ngatërrimit me ngjarjen aktuale. Përmbajtjet e manipuluara ose të krijuara me inteligjencë artificiale nuk paraqiten si dokumentim real.
Në çështjet me interes publik, ORA NEWS synon pasqyrimin e drejtë të qëndrimeve përkatëse. Personave ndaj të cilëve ngrihen pretendime serioze u kërkohet reagim, kur rrethanat e lejojnë. Nëse reagimi nuk sigurohet, kjo mund të sqarohet në publikim dhe qëndrimi i mëvonshëm pasqyrohet sipas rëndësisë së tij.
Lajmi, analiza, komenti dhe përmbajtja reklamuese identifikohen në mënyrë të dallueshme. Përmbajtja e sponsorizuar shënohet qartë. Gazetarët dhe drejtuesit editorialë shmangin konfliktet e interesit që mund të cenojnë besueshmërinë e raportimit.
Raportimi respekton dinjitetin njerëzor, privatësinë, mbrojtjen e të miturve dhe prezumimin e pafajësisë. Publikimi i identitetit ose i pamjeve të ndjeshme vlerësohet sipas interesit publik dhe ndikimit te personat e prekur. Në çështjet gjyqësore dallohen hetimi, akuza dhe vendimi përfundimtar.
Zbatimi i Kodit mbikëqyret nga drejtimi editorial. Rastet e ndërlikuara trajtohen me vlerësim të posaçëm editorial dhe, kur është e nevojshme, ligjor. Kodi rishikohet periodikisht dhe zbatohet pas miratimit nga struktura kompetente e ORA NEWS.
